Minsa'y Nagsasambit ng Pangarap ang Huni ng Ibon

Maglalaro ako
Sa lumang paraiso ng paru-paro
Sasama sa landas ng ligaw na hangin
At doon
Ibabahagi ko sa kalikasan ang isang pangarap
Maabot na sana kita.

Huhulihin ko ang huni ng kulisap
Baka sakaling maikulong sa aking mga palad
Dahil nandirito
Ang sumpang nagdurugtong sa atin
Sa bukas na aking tinatanaw
Upang palamutian ng malamyos nilang himig
Maabot na sana kita.

Samahan mo ako'ng hulmahin ang kasaysayan
Kung sakali mang mahiwalay ka sa aking landas
Sapagkat ako na ang nagtakda
Na sa huling tuldok tayo pa rin ay iisa
At ipagbibigkis ng pinatibay na bagin sa ating puno.

Salamat sa 'yong bukas ng palad
Maaabot na rin kita.

Masarap mahimlay
Sa pugad ng isang pangarap....